username o email
password

Ti piace Aphorism?
Segnalaci su Google

Inserisci la tua e-mail per ricevere gli aggiornamenti

in archivio dal 06 dic 2010

Vincenzo Orlando

06 aprile 1947, Petralia Soprana

elementi per pagina
elementi per pagina
  • 13 dicembre 2010
    Nuda comi Ddi' 'a criò.

    A Suprana,
    un paisìaddu 'i petra,
    comu un vavaluciu,
    spuntàiu di sutta 'ne valàta.

     
    M'ebbrancicàiu 'ncapu 'i spini,
    e si quarcunu mi gridava
    o mi cumannava…

    comu un curnutu,
    niscìa d'a scorcia ellura ellura,
    'u jinchìa ‘i vava.


    O' paisi, mi ricùardu,

    cìnamu 'un ci nn'era,
    e pi' chissu,
    certi siri,
    iera 'ne caruvanìa...

    .
    Cu' 'a machina di Binidittu
    o chidda di me patri Cicciu,

    ‘i genti ìvanu o’ cinamu a Suttana

    o'puru a Castiddana.

    'Ne sira, che a Suttana
    facìanu 'ne pellìcola vastàsa,
    pi' chiddi di diciottànni 'ncapu,
    mi misi cu' Pinu,
    e senza diri nenti,
    no' scuràri,
    cuminciammu e caminari.

    Dùappu menz’’ura di camurriari,
    pu fattu ch'encòra
    i' diciott'anni i’ ‘a ’vìa e fari,

    ni ficiru trasiri
    e ni jìammu e 'ssittari 'n prima fila.


    I luci s'estutàru…..

    E “Nuda comi Ddi’ ‘a criò” ‘ncumincià.

     

    Ma iamuninni o’ nuastru…

    C‘on certu puntu
    vìtti 'ne cosa che veramenti
    tantu vrigugnusa 'un gnera:

    u' bìaddu pìazzu 'i nacchiu…

    un pìanzu bbùanu comu,
    si livava ‘i mutanni
    e ncapu 'i scarpi,
    addritta, s’i sfilava…..

     

    Ma vi pari che fu pi' chissu
    che mi trammazzàiu?

    Certu,fin'e tànnu,
    di sti cosi i'  'un ne 'vìa vistu mai!.....

     

    Sintìtivi chista:

    quannu s’eddumaru ‘i luci

    duappu ‘u primu tìampu….

    Minchia!

    Mi siccà ‘u sangu!

    Me patri…..

    Ddà ‘ncapu ‘a galleria

    che s’effacciava

    comu di ‘ne barcunata….

     

    Ristaiu di petra!
    e m'evissi fattu nicu nicu,
    comi 'un crastuni,
    quannu intra 'a scorcia si ni trasi.

    Capìu che ddu cascittùni
    che si c’essittava o' latu
    c’evìa dittu,
    ridiànnu, comu si cugghiuniava:
    - Ouh!,
    talè cu c'è......-

     
    Si misi tisu

    e mi talià mutu.
    L'ùacchi stritti
    e 'u mussu tratu.....

    Parìa che
    m'evissi sparatu….

     
    Madonna du Càrminu!
    iera essittatu,
    ma mi sintìu sfunnari....


    Mi calàiu l'ùacchi
    e quannu 'i luci s’estutaru,
    cch’ev’a e fari?

    Finta che taliava 'a tila,
    ma 'u cìnamu oramai
    ira chiddu che m’espittava intra,

    si ci jiva...

     

    Niscìammu fòra….

    Già m’u figurava…..

     

    Si misi 'n posa…

    E ccu n’atra vuci
    si misi e parrari l'italianu ....

     
    “ Tu,,,,,,che cosa vuoi!”

     
    E cu' ddu 'itu
    mi disignà nell'aria
    qual'era 'a strata
    che m'evìa e faria pedi.

    'A cuda 'mìanzu'i gammi,
    cu ddu pìazzu ‘i fissa
    ch'era cu mìa,

    pigghiannu pp’a trazzera,

    e viola-viola,

    fùammu a Suprana
    prima d’iddu…..

    Di cursa intra m’intanaiu
    e lestu n'o jusu,
    derrìa a vutti, m'emmucciàiu.

    Tràsi iddu comi’un orcu,
    sbatti 'i porti,
    'i 'ncavigghia
    e, a me matri,
    che ci dici d'un chiùdiri,
    chè so' figghiu encòra 'un c'era,

    erria ‘ncazzatu,

    cci rispunni:

    “E mancu e’ tràsiri!

    né stasira, né mai! "

    I' che trimava m'ebbrazzava 'a vutti.


    E iddu che circava, caminava,
    iva susu.......
    beddamàtri…. che scinnìa!....

    .
    Comi ‘ne lumaca, mentri mi smuncìa,
    di dda vutti facìannumi curazza,
    senza vulìri fici u' scrùsciu….


    Gràpiti cìalu!.....
    'Un vi dicu 'i gridàti, 'i lignàti...
    ed evìa ne' mani 'ne cavigghia...

    Pi' scappari cchi putìa fari?

     
    Ddu bìaddu magghiunìaddu,

    si fici 'n 'ui middìchi.
    Mianzu ne' so' mani
    e mianzu m’erristà misu.

    Chi notti di luna!...

    Frisca dda nuttata….
    E 'u cìalu iera stiddatu!
     

     

     
  • 07 dicembre 2010
    Me nanna

    Me nanna,s'evissi jutu a scola,
    evissi eddivintatu 'ne professoressa,
    'mmeci disigna sulu 'a firma,
    e sempri ‘a vidi tisa
    comu 'ne barnissa.

    V'essicuru che 'un jè fissa?

    Quannu si dici che
    'un pùanu pàtiri li corna!...

    'I corna di me nanna,
    dunni trùzzanu,
    spàccanu lu munnu!

    Figghia di Ciccu 'u suttanìsi,
    comu sìentu,
    eddivàta e scafazzàta

    d'i timpùna mìanzu 'i troffi,
    mentri 'u pitittu
    cafuddàva ncapu 'i genti,
    fìmmina com'era,
    cu' 'i scarpi di pilu,
    senza nè libbra e mancu borsa,
    sulu cu 'ne sacchìna tìnta,
    mìenz’i tirrena straviava,
    e caccia d'ecìaddu,
    e l'acqua si vivìa d'a funtanedda.

    Jucàva cu' 'i cuticchia
    e d'i valateddi ni facìa casuzzi,
     quannu quadiàva lu stiddazzu
    e cci sudav’a frunti,
    si mittìa ell' ùmmira,
    sutta n'àrvulu di cercia.

     

    Di sira 'a cumannava 'u suli
    e di matina 'i stiddi,
    idda, che si susìa,

    o’ cantu di lu gaddu.

    .
    Ncappularàta quannu c'era vìantu,
    o s'ennigghiava 'u cìalu,
    che già chiuviddicava
    e picca ci vulìa

    che vinìa ‘ne timpesta,
    trasìa 'i muli
    e jiva e chiùdiri 'i finestri.

     
    Lampi ,trona
    acqua e vìantu

    cci parìanu carizzi,

    e iera pruvidìanzia

     dd’acqua

    duappu l’arsura ncapu l’erva sicca,

    e ‘i tirrena cripati,

    comi facci ‘i vìacchi.


    Puru scazi, ‘i ggenti

    evìanu jutu derria o Curgifissu,

    ccu ‘ne cannila e’ mani

    e ‘ne curuna ‘n testa…

     

    Quannu chiuvìa

     l’acqua, ellavancava timpi

    e trascinava petri, arvuli

    e ogni sorta di munnizza,

    fina dda sutta o’ chiumi

    dunni nasci ‘u Sarsu.


    Quannu pùai scampava,
    e 'n cìalu 'n arcu
    di milli culura s'eddumava,
    puru che facìa encora friddu,
    si pigghiàva 'ne pignàta c'u cupìarchiu,
    e niscìa pi' cògghiri crastùna,
    vavaluci e picureddi
    ch'evìanu nisciutu 'i corna
    ellura,ellura.

    Favi squadàti,
    vurrànij,
    aprùacchi.....
    s'i cuddava comu caramèli.
    Cicòrii,
    finùacchi
    e purretta......
    e pani duru nn'o sìaru d'a ricotta…..

     
    Si pùai si sintìa gnè dibulizza,
    n'ùavu d'u culu d'a gaddìna,friscu,
    si sursava crudu,
    e un muccunìaddu 'i vinu
    di la vutti,
    e mai che ci dulìa 'a testa.

    E tutt'u paisi 'u cuttùni urdìa,
    'u tulàru 'ncuminciava,
    e di tèssiri 'a manu mai si ci stancava.
    Cu' 'i pìadi ncapu 'i pidalùra,
    'ntramannu scugghiutìni,
    o 'ntramannu pèzzi,
    niscijanu d'u tulàru
    tappìta,frazzàti,
    niscijanu tuvagghi,
    vìartuli e bisàzzi.

    Chiù dura d'i diavuli du 'nfìarnu,
    n'on jùarnu ma nanna si mancia mill'anni.

    E, 'un c'è dumìnica
    che 'un ‘a vidi  a' missa.
    P'i festi cumannati si cunfessa,
    e dùappu che si còdda l'Ostia,
    si senti chiù frisca.

    Quannu prega,

    parra spissu cc’u Signùri.
    Cc’eddomanna pirdunu d'i piccàti,
    'a gràzzia di iri 'n paradisu,
    e comu si parrassi e sò maritu,
    quann'un n'avi,
    cc’eddomanna sordi,

    pruvidìanzia,

    e puru ‘u manciari

    ed ‘a ‘nzalata.

    Si pi' disgrazia, però,
    ci veni dissapìta,
    stam' eccùra che s'incàzza!.

    .

    S’a pigghia ccu tutti,

    senza che talìa nn’a facci,

    s’impaia davanti a cu je gghiè.

     

    Sulu d’a morti idda si scanta,

    ed o’ parrinu, cci v’e paga ‘i missi.

     
  • 07 dicembre 2010
    'Un mi pùazzu scurdari....

    ... 'U suli, quannu tracuddava,
    'ddu cìelu di cristallu acquamarìna
    e, ddà 'n funnu,
    'ddi negghi scuri e pipitùna,
    e stinnicchiàti, comu tanti punziddati,
    che parìanu di cuttùni.

     
    Chiù 'n funnu encòra,
    dà luntanu, u' bìaddu tàgghiu
    ‘ntra ‘i muntagni scuri
    e 'u cìalu ch'eddumàva.

    'A friscùra di la sira,
    l'acqua frisca d'i cannòla,
    dunni s'eppuzzàva!...

     

    E, quannu, di matina,
    friscu com'i rosi du' jardìnu ,
    sbricciàtu d'acquazzìna, mi susìa,
    sunava un tùaccu di campana
    pi' ringrazziari 'i Santi
    ed 'o Signuri
    ch’errìa evia spuntatu 'u suli,

    dda matina.


    E un vinticìaddu,
    mi facìa carizzi,
    comu di unu

    che 'un sapìa cu ièra.

     
    E quanti bedd'acìaddi,
    che vulannu,
    ciuciuliavanu  n'o cìalu!

    Bedda muntagna d'u paisi mia!


    Bìaddu paisi di petri 'n siccu
    cu' quarchi cazzulata di quacìna!

     
    Bedda furtizza d'a Madonna 'Oritu!

    Muschèa d'i Saracìni,
    spanni di tesòri,
    di vistimenta erraccamàti d'oru,
    di quatri e màrmari 'ntarsiati,

    cha pàrinu pittati.
    Ch'era bedda dd' affacciata,

    Ccu attuarnu ne terna ‘ufirriata.

     
    E dà gatu 'ddi du' bìaddi gugghi,
    di milli culura ellicchittàti,

    che parìan’ erraccamati.

    Ed 'a Matrìci?
    cu' ddi du' santi 'i petra,
    nichi ,ma ccu ‘i testi 'ranni:
    Pìatru cu' 'i chiavi
    e Paulu c'u' libbru,
    sutta d’i campani,
    e sutta ‘u roggiu,

    tutti ‘i quarti d’ura

    che sunava.

    Bìaddu paisi mia ebbannunàtu!

    L'erva di to' tìmpi,

    comu ‘ne crapa,

    masticava,

    o ppi pasta e pani

    Nicolinu m’a canciava.

    Quannu puai di mmìarnu, nivicava,

    si inchìanu di nivi
    e s’ammarravanu li strati.

     
  • 07 dicembre 2010
    'I fantasimi

    Dùappu tantu tìampu
    oj o' me paisi,
    mi fici 'ne caminata a' chiazza.


    'Ne picca, che 'un avìa pirdutu 'i vista,
    'un s'evìanu canciatu 'nni li facci;
    ma, criditimi,atri
    mi pàrsiru fantàsimi...
    chi dicu?......

    "Ciccu Picialla" parìa eddubbàtu
    pi' fari l'atturi du tegàtru......
    E Turìddu, mi ricuardu
    che s'erriminàva bùanu
    e cu 'i fìmmini 'ballava strittu.

     
    Mi parsi tanticchia errappàtu,
    'u taliàiu.
    ma 'un ci vosi diri nenti.

    'Un nni parràmu pùai
    di ddi picciùatti
    che l'ùrtima vòta vitti
    quann’eranu picciddi..
    'Un sàcciu nè comu 'i sanu sèntiri,
    nè di cu su' figghi.
    Mancu a 'nciùlia  sacciu,
    che tutti o' me paisi,
    s'un evìanu 'u " Do’' ,
    n'evìamu una.


    N'o vicinàtu c'era:
    'a 'Ncicunàta,Scapèttu,
    Ciancilacìgna,Tarduvinìsti,
    Varvajànnu,Lucilalùna…..
    e dà derrìa.'u Nanu,'a Santòra,
    .'a Bianna, 'a Tartùca, 'a Cirdìsa ......
    e......pur'a Buttanàzza!

    Ma lassamu iri.........
    Mìanzu stunàtu, mi firmàiu.
    E fu 'ne 'ddu momentu
    che mi sintìu vulàri,
    pi' ghìrimi e 'ssittàri
    davànti,’n on tegàtru
    dunni si vidìanu sfilàri
    tanti genti, unu a unu,
    tutti trasparenti com'a cira;
    ed a tutti 'a cira,
    oramài squagghiàta,
    cc’ evì’errappatu 'i facci.


    Tutti 'u passu evìanu canciàtu,
    e quarchi culu
    'un s'ennacàva chiù
    comi 'ne vota.

    I' mi taliàiu 'i manu,
    'i vrazza pilùsi....
    e quannu mi vitti
    'nno cristallu di 'ne porta,
    ch'evìa l'ùacchi chiù sfunnati
    e stanchi,
    'a vàrva bianca
    e a testa tignùsa e lucenti,
    happi e tistiari,

    senza diri nenti.

    Cu 'avìa e diri quann'evìa vint'anni?

    Comu vola 'u tìampu!.......

    Pàssanu 'i biddìzzi,
    passa 'a giuvintù.
    ed a cu l'àvi'
    cc’errèstanu 'i ricchizzi......

     
    Fina che 'a morti,
    cu' 'ne fàci che 'un 'a pirduna e nuddu,
    'un 'i mèti, comu ‘i spìchi,
    quannu s’erricogghi lu furmìantu.

     
  • 06 dicembre 2010
    'I pisci

    Secunnu mia 'i genti sunu com'i  pisci.


    Ci sunu pisci rànni e chiddi chiù picciddi.

    -Pirchì?- Mi domannu
    -si màncianu tra d'iddi?
    anzi,sunu 'i ranni
    che si màncianu 'i picciddi?-


    Caminano sti pisci......
    caminanu ,spìarsi ppi' lu mari,
    e, senza sapìri nenti
    di chiddu che, oj-dumani,
    ci po' capitàri.

     

    Tanti, ch'è mìagghiu,
    mùarino di morti naturali,
    atri mmeci
    sulu 'u Patetèrnu 'u po' sapìri...

     

    Mischìni!
    avìanu priàtu tantu
    ch 'on ci succidissi nenti!

     


    'Un ni parràmu pùai
    si, caminannu caminannu,
    'ncòccianu nne magghi

     

    di 'ne rriti bedda ranni,
    che mentri si dùnanu aiùtu,
    cu' li dìanti e cu' li pinni,
    masticannu lazzi,
    dùnanu l'ùrtimu sospìru,
    e mancu Ddi' si l'arricògghi.

     

    Gàtri passanu di li bancareddi
    ppi' sazziàri 'u pitittu
    di chiddu che s'accatta e si nni futti.

     

    Si pùai
    quarchedunu si senti piscicani,
    o puru essimigghia e ‘na balena,
    chi ci voli?.....
    Puru 'ne bumma ci pùanu sparari...
    e finisci eccussì
    di essiri 'u patruni di lu mari.

     

    Ma nuàtri 'un sìmu pisci.
    Sìmu uomini d'onuri?

     

    Allùra 'un evìamu ch'aspittàri:
    o ni vrùadicanu
    quannu veni l'ura,
    o, mentri sìmu vivi.

     
  • 06 dicembre 2010
    'U sùannu d'u sceccu

    'Ne notti ‘u sceccu si sunnà
    che facìa 'a cursa d'i cavaddi.
    Evìa canciatu a vardedda cu' la sedda
    e 'a visazza e 'i vìartuli
    ‘a ‘vìa ittatu a gnuni.


    Bìaddu! che si ni futtìa
    puru di l'àncili cu' l'ali,
    quannu satava ncapu 'i trava,
    parìa che vulava!.

    ..
    E, 'a fudda, d'i scaluna,
    che gridava!.......

    'Ne ddu momentu
    a'cu c’evissi dittu sceccu,
    'i jta d'a manu
    c' evissi fattu muzzicàri.


    Durmìja.....
    si sunnava.....
    e parìa che 'a vucca ci ridìa.

    Bìaddu! stu sceccu,
    che stanotti
    fa sti sùanni d'oru!....

    -Sùsiti sceccu!!- e 'u patruni
    ci cafùdda n'a panza 'ne pidata.

    -Puarcu du ccà e puarcu du ddà!
    Cchi minchia dùarmi
    'un 'u sa' che c'è di travagghiari?


    Talè!......piccatu!.....

     
    Iera no' mìagghiu suannu…
    stava vincìannu.....
    A cruna di dàuru eppinnùta o' cùaddu...
    Iera 'u primu
    e 'un nu sapìa ancòra nuddu....

    Si misi e quaciari , e tistiari….

    e ‘un evìa manc’ a forza di gragghiari.

     

    Cadì nn’errìa

    ncapu 'a pagghia,
    s'inchiappà di mmerda,
    e cu' 'u sò patruni,
    comu 'u jùarnu prima,
    senza pipitàri,
    si misi errìa e carriari.